Fyrir rúmum mánuði byrjaði bakaríið Cooking Harmony að framleiða bollurnar mínar og sítrónuköku undir vörumerkinu Sæluréttir Siggu. Þetta hefur verið lærdómsríkt og skemmtilegt ferli og vinsældirnar komið mér ánægjulegga á óvart. Ég hélt að ég væri að búa til uppskriftir fyrir lítinn hóp sérvitringa, þó ég vonaði auðvitað að fleirum þætti eitthvað af réttunum góður. Átti þó síst von á þessu.
Í upphafi höfðu bakararnir varla undan og sumir gripu í tómt þegar þeir heimsóttu bakaríið. Viðskiptavinir voru farnir að hringja á undan sér til að vera vissir um að vörurnar væru til 🙂
Við höfum líka lent í vandræðum vegna hráefnisskorts. Fyrst varð ómögulegt að fá stevíuduft, síðan hvarf teffmjöl og cassavamjöl tímabundið af markaði. Sem betur fór var hægt að nota monkfruit duft í stað stevíunnar og svo komst ég að því að hægt var að nota sesammjöl og hrísmjöl í stað teffmjöls og cassavamjöls í bollurnar. Þær eru engu síðri. Gott að vita fyrir ykkur sem eruð að baka þær heima.
Í nýjustu fréttum er það helst að nú er ég búin að þróa jólakryddköku, sem trúlega bætist við innan tíðar.
Verði ykkur að góðu! 🙂
