Hráefni
400 g þorskhnakkar
salt og svartur pipar
1/2 límóna
rauðlaukur, límóna, dill og krydd í botn pönnunar til að gufusjóða, ef þið eigið ekki gufusuðutæki eða þar til gerða grind til að setja í pönnuna.
Aðferð
Skerið þorskhnakkana í bita, kryddið, kreistið smá límónusafa yfir og gufusjóðið.
Ef þig eigið til þess gerða græju er það frábært en svo eru líka til grindur sem passa í pönnur og þá má setja svolítið vatn í pönnuna, fiskinn á grindina og gufusjóða fiskinn við mjög vægan hita í nokkrar mínútur. Þegar hann er orðinn hvítur er hann tilbúinn.
Ég á hvorki gufusuðutæki né grind svo ég skar bara niður rauðlauk, límónu og krydd. Setti það í pönnuna ásamt smávegis vatni. Þegar suðan var komin upp lagði ég fiskinn varlega ofan á, setti lokið á pönnuna og gufusauð fiskinn í nokkrar mínútur.
Græn sósa
Hráefni
100 g ólífuolía
1/2 límóna (safinn)
1-2 geirar hvítlaukur
lítill biti engifer
1 msk jalapeño
væn lúka steinselja
væn lúka basilika
1 og 1/2 lúka dill
salt og svartur pipar
Aðferð
Hreinsið hvítlauk og engifer og kreistið safann úr límónunni. Allt sett í blandara og maukað þar til sósan verður silkimjúk.
Grænkálssnakk
Hráefni
1 poki af grænkáli
ólífuolía
salt og svartur pipar
Aðferð
Forhitið ofninn í 150-160 gráður.
Hreinsið grænkálið af stilkunum með því að renna fingrunum eftir honum. Í fínu lagi þó fíngerði hluti stilksins verði eftir.
Setjið það í stóra skál, nuddið með olíu og kryddið. Færið grænkálið yfir í ofnskúffu og bakið það í ca. 12 mínútur.
Færið það yfir á grind þegar þið takið það út úr ofninum.
Græna sósan er sett á disk, þorskhnakkinn ofan á og grænkálssnakkið mulið yfir. Með þessu er hægt að hafa salat, hrísgrjón, kínúa, kartöflur eða eldað grænmeti. Nú eða bara hvað sem ykkur dettur í hug.
Sæluréttir Siggu er skrásett vōrumerki. Uppskriftirnar eru einungis ætlaðar til einkanota. Óheimilt er að nota þær í hvers kyns veitingaþjónustu án skriflegs leyfis frá eiganda vōrumerkisins. Dreifing, afritun, birting og ōnnur notkun uppskrifta og ljósmynda á síðunni er einnig óheimil án leyfis.
