Hráefni
250 g hrígrjóna spaghettí, frá Rapunzel
20-25 cherry tómatar, gjarnan á greinum en ekki nauðsynlegt
ólífuolía
salt og svartur pipar
rautt pestó, sjá uppskrift fyrir neðan
1/2 bolli vatn af spaghettí-inu, eða úr krananum
Aðferð
Setjið mikið vatn í miðlungs stóran pott og komið upp suðunni. Setjið spaghettí-ið útí og sjóðið í 10-12 mínútur. Sigtið vatnið frá spaghettí-inu og takið 1/2 bolla af því frá fyrir sósuna.
Raðið tómötunum á bökunarplötu og setjið smá ólífuolíu á þá. Kryddið með pínu salti og vel af svörtum pipar. Bakið í 200 °C heitum ofni í 15-20 mínútur.
Meðan spaghettí-ið er að sjóða og tómatarnir í ofninum er fínt að gera pestóið. Má samt gera það löngu fyrr ef út í það er farið.
Rautt pestó
Hráefni
1 krukka sólþurrkaðir tómatar (tómatar og olía 285 g, þar af tómatar ca. 145 g)
1/4 bolli vatn
1/4 bolli graskersfræ, frá Rapunzel
30 g fersk basilíka
2-3 hvítlauksgeirar
1/2 tsk chilli flögur, frá Kryddhúsinu
salt og svartur pipar
Aðferð
Afhýðið hvítlaukinn og skerið í grófa bita. Setjið allt í matvinnsluvél eða blandara og maukið. Hversu mikið fer eftir smekk. Mér finnst gott að hafa pestóið dulítið gróft.
Takið helminginn af pestóinu og setjið í krukku og hinn helmingurinn fer í stóran skaftpott. Krukkan fer í ískápinn og nýtist síðar, t.d. sem álegg á brauð, pizzusósa eða til að bragðbæta soðin hrísgrjón.
Blandið 1/2 bolla af pastavatni, eða vatni, saman við pestóið í skaftpottinum og hitið. Þegar það hefur samlagast og suðan er rétt að koma upp er spaghetti-inu blandað vel saman við þessa fínu pastasósu.
Fært upp á diska og nokkrum af bökuðu tómötunum raðað ofan á hvern þeirra. Gott að rífa vegan parmesan ost yfir og ég skreytti líka með basilíku.
Það er hægt að nota hvaða pasta sem er í þennan rétt, en hrísgrjónaspaghettí-ið frá Rapunzel er líkast þessu sígilda finnst mér, bæði hvað varðar bragð og áferð.
Uppskriftin er gerð í samvinnu við Rapunzel og Kryddhúsið.
Sæluréttir Siggu er skrásett vōrumerki. Uppskriftirnar eru einungis ætlaðar til einkanota. Óheimilt er að nota þær í hvers kyns veitingaþjónustu án skriflegs leyfis frá eiganda vōrumerkisins. Dreifing, afritun, birting og ōnnur notkun uppskrifta og ljósmynda á síðunni er einnig óheimil án leyfis.
